Një zjarr i përmasave të mëdha ka përfshirë fshatrat Galush dhe Gjevurtë, të Peqinit, duke djegur rreth 20 hektarë me ullishte, pemëtore dhe shkurre.
Flakët janë përhapur me shpejtësi në një sipërfaqe të konsiderueshme, duke krijuar disa vatra të mëdha. Sipas të dhënave nga terreni, situata paraqitet kritike dhe zjarri ende nuk është vënë nën kontroll.
Për shuarjen e flakëve janë mobilizuar dhjetëra efektivë zjarrfikës dhe mjete nga Peqini, si dhe nga bashkitë përreth. Operacionit në terren i janë bashkuar edhe dy helikopterë, të cilët po ndërhyjnë nga ajri.
Vëmendja kryesore e forcave të emergjencës është përqendruar te mbrojtja e banesave dhe banorëve, pasi vatrat e zjarrit ndodhen pranë zonave të banuara.
Era dhe terreni i vështirë po pengojnë ndërhyrjen, ndërsa ekipet po punojnë për izolimin e vatrave dhe krijimin e barrierave që do të pengonin avancimin e flakëve drejt banesave.
Ndërkohë, operacioni nga toka dhe ajri vijon, ndërsa strukturat e emergjencave po monitorojnë situatën.
