Familja e Ferne King, 25-vjeçares nga Skocia që humbi jetën gjatë pushimeve në Durrës, po kërkon ndihmë financiare për të përballuar shpenzimet e riatdhesimit të trupit të saj në Britani.
E reja ndodhej në Shqipëri së bashku me vajzën e saj dyvjeçare, kur u gjet pa shenja jete në apartamentin që kishte marrë me qira përmes platformës Airbnb, pranë Muzeut Arkeologjik në Durrës.
Ngjarja u regjistrua më 8 tetor. Ishte pastruesja e apartamentit ajo që e gjeti 25-vjeçaren në shtrat dhe njoftoi menjëherë urgjencën. Pranë saj ndodhej edhe vajza e vogël, e cila raportohet se ishte në gjendje të mirë shëndetësore.
Sipas raportimeve të para, në trupin e të resë nuk u konstatuan shenja të jashtme dhune. Një arrest kardiak u përmend si një nga shkaqet e mundshme të vdekjes, por përcaktimi përfundimtar kërkonte rezultatet e ekzaminimeve mjeko-ligjore dhe analizave përkatëse.
Pas humbjes së papritur, familjarët dhe miqtë e Fernes kanë nisur një fushatë në platformën GoFundMe për të mbledhur paratë e nevojshme për kthimin e trupit në Britani.
Sipas organizatorëve të fushatës, familjes i janë kërkuar rreth 10 mijë paund për të përballuar shpenzimet e riatdhesimit. Një shumë e tillë përbën një barrë të rëndë për të afërmit, të cilët po kalojnë një periudhë të vështirë pas humbjes së nënës së re.
Në mesazhin e publikuar në faqen e mbledhjes së fondeve, Jade Wilson u bën thirrje njerëzve të kontribuojnë ose ta shpërndajnë apelin, në mënyrë që familja të marrë mbështetjen e nevojshme.
“Ky është një trishtim dhe stres i madh për familjen dhe miqtë e saj. Ferne duhet të jetë në shtëpi!”, shkruhet në apel.
Mesazhi mbyllet me fjalët prekëse: “Zoti ka fituar një engjëll, por shpirti i saj i bukur e kërkon atë në shtëpi”.
Humbja e Fernes ka lënë pas vajzën e saj të vogël, ndërsa familja vijon përpjekjet për ta kthyer në shtëpi dhe për t’i dhënë lamtumirën e fundit në vendlindje.
