Një ngjarje e rëndë me armë zjarri ka ndodhur rreth orës 14:00 të ditës së sotme, në vendin e quajtur “Mbikalimi i Dërmënasit”, në Fier, ku është plagosur një grua.
Sipas informacionit paraprak të Policisë, e plagosur është shtetasja Suzana Mërrnica, ndërsa autorët e dyshuar janë identifikuar si Afrim Cimili, 66 vjeç dhe Ali Cimili, 23 vjeç, banues në Dërmënas, babë e bir. Të dy janë shpallur në kërkim. Mes palëve paraprakisht mësohet se ka pasur një konflikt njëvjeçar që ka agravuar në krim.
Për kapjen e të dyshuarve, policia ka ngritur pika kontrolli në hyrje-daljet e qytetit të Fierit, si dhe në akset kryesore “Fier-Vlorë” dhe “Fier-Lushnjë”. Shërbimet e Policisë po krehin zonën përreth vendngjarjes për të lokalizuar dhe neutralizuar autorët.
Grupi hetimor ndodhet në vendin e ngjarjes dhe, nën drejtimin e prokurorit, po punon për sqarimin e plotë të rrethanave dhe për mbledhjen e çdo prove që do t’i shërbejë hetimit.
Burime jozyrtare bëjnë me dije se në vendngjarje janë gjetur gëzhoja nga dy armë zjarri.
Sipas burimeve policore, e plagosura dhe djali i saj janë të afërm të Azgan Mërnicës, personit që vrau efektivin e forcave “Shqiponja” në një ngjarje të bujshme të ndodhur më parë. Kjo lidhje familjare dhe pse duket pa lidhje me atentatin mund të jetë një element për të kuptuar më mirë motivet e ngjarjes.
©️zërionline
