Një sasi prej 52 kilogramësh luleshtrydhe të importuara nga Greqia ka rezultuar jo-konform me standardet e sigurisë ushqimore, duke ngritur alarmin për konsumatorët dhe autoritetet. Autoriteti Kombëtar i Ushqimit (AKU) njoftoi se pas analizave laboratorike, produkti përmbante nivele të papranueshme të substancave që bien ndesh me legjislacionin në fuqi.
Sasia u analizua më 17 shkurt 2025, në kuadër të Planit të Monitorimit me Bazë Risku, dhe megjithëse ishte tashmë shpërndarë dhe shitur në treg, AKU aktivizoi sistemin e gjurmueshmërisë për të identifikuar dhe tërhequr produktin nga qarkullimi.
Ky incident ka shtyrë AKU të ndërmarrë masa të menjëhershme parandaluese, duke urdhëruar kontroll rigoroz në të gjitha Pikat e Inspektimit Kufitar. Të gjitha ngarkesat e ardhshme me luleshtrydhe nga Greqia do të bllokohen deri në daljen e analizave përkatëse.
AKU ka kategorizuar këtë produkt si me risk të lartë për konsumatorin dhe ka njoftuar Sistemin e Njoftimit të Shpejtë për Ushqimin dhe Ushqimin për Kafshë (RASFF). Në një sqarim për publikun, AKU thekson se ishte pikërisht ky institucion që njoftoi RASFF, si pjesë e procedurave të monitorimit, dhe jo anasjelltas siç është raportuar në disa media.
Masat e ndërmarra vijnë në një moment kur tregjet mbushen me produkte të importuara sezonale, dhe AKU apelon për kujdes nga konsumatorët gjatë blerjeve, duke kontrolluar origjinën dhe kërkuar informacione mbi sigurinë e produkteve.
Ky rast ngre sërish pyetje mbi sigurinë e produkteve të freskëta që hyjnë në vend dhe tregon nevojën për një monitorim më të gjerë dhe efikas për të mbrojtur shëndetin e qytetarëve.
©️zërionline
