Një operacion policor i koduar “Storm 3”, i zhvilluar nga Sektori për Hetimin e Trafiqeve të Paligjshme pranë Drejtorisë Vendore të Policisë Durrës, ka çuar në zbulimin e një ambienti të përshtatur për ushtrimin e prostitucionit, pas një hetimi dyjavor të zhvilluar me metoda proaktive.
Gjatë operacionit u zbulua një banesë në lagjen nr. 13, Plazh, Durrës, e marrë me qira nga dy shtetase kineze, R. W., 54 vjeçe, dhe X. X., 41 vjeçe, ku ato ushtronin aktivitetin e kundërligjshëm të prostitucionit. Të dyja këto shtetase janë proceduar penalisht për veprat penale “Prostitucioni” dhe “Shfrytëzimi i prostitucionit”.
Gjithashtu, janë proceduar penalisht edhe 6 shtetas shqiptarë nga Durrësi dhe Kruja, të cilët u konstatuan në banesën në fjalë gjatë ndërhyrjes së Policisë.
Nga veprimet hetimore rezulton se aktiviteti i prostitucionit ishte pjesë e një skeme më të gjerë kriminale, ku një grup i strukturuar kriminal, me pjesëmarrje të shtetasve kinezë, rekrutonte gra në Kinë dhe i sillte në Shqipëri me qëllim ushtrimin e prostitucionit. Ky grup kriminal siguronte apartamente me qira për të zhvilluar aktivitetin, ndërsa rekrutimi i klientëve bëhej përmes platformave online, duke u dërguar më pas vendndodhjen.
Në cilësinë e provës materiale, Policia sekuestroi:
- 2 pasaporta të shtetaseve kineze
- 86 400 lekë dhe 440 euro
- 3 aparate celular
- disa karta banke dhe karta telefoni
Materialet procedurale i janë referuar Prokurorisë për veprime të mëtejshme, ndërsa hetimet vijojnë intensivisht në bashkëpunim me organin e akuzës për identifikimin dhe kapjen e organizatorëve të kësaj veprimtarie kriminale.
©️zërionline
