Indinjata publike dhe vala e reagimeve negative lidhur me skandalin e paraqitjes së heroit kombëtar Çerçiz Topulli në Muzeun e Kalasë së Gjirokastrës ka sjellë lëvizjen e parë institucionale. Drejtori i Agjencisë së Trashëgimisë Kulturore Gjirokastër, Florian Hysi, ka dhënë zyrtarisht dorëheqjen nga posti i tij. Përmes një deklarate publike, Hysi ka pranuar se ajo që ndodhi u konsiderua si një gabim, ndërsa ka theksuar se tashmë situata është korrigjuar dhe se ai merr të gjithë përgjegjësinë personale për këtë ngjarje që tronditi opinionin publik.
Deklarata e dorëheqjes së Florian Hysit:
“Pas një periudhe pune të përkushtuar në shërbim të trashëgimisë kulturore, muzeve dhe Gjirokastrës, kam vendosur të jap dorëheqjen time prej pozicionit që mbaj. E bëj këtë vendim me përgjegjësi dhe me bindjen se çdo detyrë publike duhet të shoqërohet me përgjegjësi personale për çdo vendim, veprim apo gabim që mund të ndodhë gjatë saj. Ajo që u konsiderua gabim u korrigjua dhe marr të gjithë përgjegjësinë përsipër. Largohem me mirënjohje për mbështetjen e Bashkisë Gjirokastër, për kolegët dhe veçanërisht për punonjësit e Agjencisë së Trashëgimisë Kulturore, me të cilët kemi punuar dhe realizuar shumë më shumë më tepër sesa ishte bërë prej vitesh. Dorëheqja ime nuk është dorëzim nga ajo që besoj. Është një akt përgjegjësie dhe respekti për institucionin. Mbetem mirënjohës për punën e bërë, për përpjekjet tona dhe për çdo gjurmë që kemi lënë në muze dhe në kujtesën e Gjirokastrës. Do të vazhdoj ta dua dhe ta mbështes Gjirokastrën, trashëgiminë e saj dhe kujtesën tonë kombëtare, në çdo formë që do të më jepet mundësia. Ne u përpoqëm, atë që u konsiderua gabim e korrigjuam dhe punën do ta lëmë të flasë vetë.”
Si nisi skandali që çoi në dorëheqjen e drejtorit
Debati i ashpër shpërtheu pas ekspozimit të ri të veshjeve, armëve dhe sendeve personale të Çerçiz Topullit në Muzeun e Kalasë në Gjirokastër. Ky rikonceptim u realizua në kuadër të 90-vjetorit të kthimit të eshtrave të heroit në vendlindje. Mirëpo, mënyra e realizimit të portretit dhe figurës së tij u konsiderua menjëherë nga qytetarët, vizitorët dhe kritikët e artit si fyese, e turpshme dhe aspak e denjë për një figurë kaq të rëndësishme të historisë shqiptare.
Kritikat kryesore që ndezën rrjetet sociale dhe nxitën revoltën qytetare bazoheshin në disa pika kyçe që lidheshin me paraqitjen e tij si manekin apo dordolec. Kuratorët e muzeut kishin përdorur një manekin të thjeshtë për t’i veshur rrobat origjinale të heroit. Rezultati u cilësua si një personazh qesharak që ngjan më shumë me një manekin dyqanesh apo dordolec sesa me një kapedan legjendar lufte.
Një tjetër element që ngjalli indinjatë ishte efekti i filmit vizatimor. Shumë vizitorë u shprehën se vizatimi dhe modelimi plastik i fytyrës nuk ishte i denjë as për një teatër kukullash, duke mos pasqyruar aspak karakterin e ashpër, burrërinë dhe trimërinë që shqiptarët njohin përmes fotografive historike të Çerçiz Topullit.
Kjo situatë u dënua edhe për shkak të dëmtimit të imazhit për turizmin, pasi Muzeu i Kalasë së Gjirokastrës është një nga pikat më të vizituara nga turistët e huaj në Shqipëri. Një paraqitje e tillë e dobët u konsiderua si një goditje e rëndë për mënyrën se si përcillet historia dhe imazhi i heronjve tanë kombëtarë te vizitorët vendas e ndërkombëtarë. Pas shpërthimit të menjëhershëm të rrjetit dhe thirrjeve të shumta drejtuar Ministrisë, Bashkisë dhe Agjencisë së Trashëgimisë Kulturore, institucionet reaguan dhe fytyra e manekinit të debatuar u hoq. Akti i fundit i këtij skandali duket se u mbyll me dorëheqjen zyrtare të Florian Hysit, i cili mori mbi vete të gjithë përgjegjësinë e këtij dështimi kuratorial.
