Këngëtarja kanadeze Céline Dion është nderuar nga kompania Mattel me një kukull të veçantë Barbie, të frymëzuar nga një prej paraqitjeve më ikonike të karrierës së saj. Megjithatë, ndërsa modeli është krijuar për të festuar trashëgiminë e artistes, pamja e kukullës ka ngjallur diskutime mes admiruesve të saj.
Kukulla i përket koleksionit “Barbie Signature” dhe rikrijon veshjen që Dion mbajti në ceremoninë e ndarjes së çmimeve Oscar në vitin 1998, kur interpretoi këngën e famshme “My Heart Will Go On”, kolonën zanore të filmit “Titanic”.
Ajo është veshur me një fustan të gjatë blu të errët, me mëngë të gjata dhe jakë të lartë, ndërsa në qafë mban një gjerdan të frymëzuar nga diamanti në formë zemre, “Heart of the Ocean”, i famshëm nga filmi.
Céline Dion: Një nder i veçantë për karrierën time
Vetë artistja e ka mirëpritur këtë vlerësim, duke e konsideruar një moment domethënës në rrugëtimin e saj muzikor.
“Është një nder i vërtetë të bëhem pjesë e trashëgimisë së Barbie-t, përmes një kukulle të frymëzuar nga një prej momenteve më domethënëse të karrierës sime”, është shprehur Dion në deklaratën e publikuar nga kompania.
Ajo shpreson që kjo kukull të motivojë njerëzit të shprehin personalitetin e tyre me besim, të ndjekin ëndrrat dhe të besojnë te fuqia e zërit të tyre.
Sa kushton kukulla e këngëtares?
Kukulla koleksionuese është nxjerrë në shitje përmes platformës zyrtare Mattel Creations, me një çmim prej 60 dollarësh. Ajo synon të jetë një objekt i veçantë për koleksionistët dhe fansat e këngëtares, duke përjetësuar një nga momentet më të paharrueshme të karrierës së saj.
Megjithatë, krahas entuziazmit për këtë homazh, në rrjetet sociale janë shfaqur edhe komente kritike lidhur me ngjashmërinë e fytyrës së kukullës me artisten. Disa fansa kanë vënë në dyshim nëse tiparet e saj arrijnë ta përfaqësojnë siç duhet Céline Dion, ndonëse veshja dhe aksesorët janë frymëzuar qartësisht nga paraqitja e saj në Oscar.
Pavarësisht diskutimeve, kukulla shënon një tjetër vlerësim për një artiste që ka lënë gjurmë në muzikën botërore, ndërsa interpretimi i “My Heart Will Go On” mbetet i lidhur ngushtë me historinë e filmit “Titanic”.
©ZëriOnline
