{"id":22136,"date":"2026-09-15T17:03:53","date_gmt":"2026-09-15T17:03:53","guid":{"rendered":"https:\/\/zeri-online.com\/?p=22136"},"modified":"2026-09-15T17:36:18","modified_gmt":"2026-09-15T17:36:18","slug":"ervin-mata-drejt-shqiperise-gjykata-supreme-e-brazilit-miraton-ekstradimin","status":"publish","type":"post","link":"https:\/\/zeri-online.com\/index.php\/2026\/09\/15\/ervin-mata-drejt-shqiperise-gjykata-supreme-e-brazilit-miraton-ekstradimin\/","title":{"rendered":"Ervin Mata drejt Shqip\u00ebris\u00eb, Gjykata Supreme e Brazilit miraton ekstradimin"},"content":{"rendered":"\n

Gjykata Supreme Federale e Brazilit ka miratuar ekstradimin e Ervin Mat\u00ebs drejt Shqip\u00ebris\u00eb, ku ai k\u00ebrkohet nga SPAK n\u00eb kuad\u00ebr t\u00eb hetimeve p\u00ebr nj\u00eb grup t\u00eb strukturuar kriminal t\u00eb dyshuar p\u00ebr trafikimin e sasive t\u00eb m\u00ebdha t\u00eb drog\u00ebs nga Amerika Latine drejt Europ\u00ebs.<\/p>\n\n\n\n

Sipas vendimit t\u00eb publikuar, \u00e7\u00ebshtja e ekstradimit \u00ebsht\u00eb shqyrtuar n\u00eb seancat e zhvilluara nga 14 deri m\u00eb 21 gusht dhe k\u00ebrkesa e paraqitur nga autoritetet shqiptare \u00ebsht\u00eb pranuar.<\/p>\n\n\n\n

Vendimi p\u00ebrb\u00ebn zhvillimin m\u00eb t\u00eb fundit t\u00eb nj\u00eb procedure q\u00eb kishte nisur muaj m\u00eb par\u00eb dhe gjat\u00eb s\u00eb cil\u00ebs Mata kishte kund\u00ebrshtuar ekstradimin dhe kishte k\u00ebrkuar lirimin nga qelia. Gjykata e Lart\u00eb Federale e Brazilit i kishte rr\u00ebzuar m\u00eb her\u00ebt k\u00ebrkesat e mbrojtjes, duke i hapur rrug\u00eb shqyrtimit t\u00eb ekstradimit.<\/p>\n\n\n\n

Ervin Mata u arrestua m\u00eb 25 prill 2026 nga Policia Federale braziliane n\u00eb Ilhabela, n\u00eb shtetin e S\u00e3o Paulo-s. Arrestimi u krye n\u00eb zbatim t\u00eb nj\u00eb urdhri t\u00eb gjyqtarit t\u00eb Gjykat\u00ebs Supreme Federale, Alexandre de Moraes, n\u00eb kuad\u00ebr t\u00eb k\u00ebrkes\u00ebs s\u00eb Shqip\u00ebris\u00eb p\u00ebr ekstradim. Sipas t\u00eb dh\u00ebnave t\u00eb b\u00ebra publike pas arrestimit, ai dyshohej se q\u00ebndronte n\u00eb Brazil duke p\u00ebrdorur dokumente identifikimi britanike t\u00eb falsifikuara.<\/p>\n\n\n\n

Procedura e ekstradimit ishte kund\u00ebrshtuar nga avokat\u00ebt e Mat\u00ebs. Mbrojtja pretendonte, nd\u00ebr t\u00eb tjera, se Shqip\u00ebria nuk kishte respektuar afatin p\u00ebr formalizimin e k\u00ebrkes\u00ebs dhe ngrinte pik\u00ebpyetje lidhur me juridiksionin p\u00ebr veprat penale p\u00ebr t\u00eb cilat ai k\u00ebrkohej.<\/p>\n\n\n\n

K\u00ebto pretendime nuk u pranuan nga drejt\u00ebsia braziliane. N\u00eb nj\u00eb vendim t\u00eb nd\u00ebrmjet\u00ebm t\u00eb 21 korrikut, gjyqtari Alexandre de Moraes evidentonte se k\u00ebrkesa formale shqiptare p\u00ebr ekstradim ishte protokolluar m\u00eb 7 mars 2025 dhe m\u00eb pas ishte rikonfirmuar p\u00ebrmes nj\u00eb note verbale t\u00eb Ambasad\u00ebs s\u00eb Shqip\u00ebris\u00eb, t\u00eb p\u00ebrcjell\u00eb m\u00eb 2 korrik 2026. Edhe Prokuroria e P\u00ebrgjithshme e Brazilit ishte shprehur n\u00eb favor t\u00eb k\u00ebrkes\u00ebs p\u00ebr ekstradim dhe kund\u00ebr lirimit t\u00eb Mat\u00ebs.<\/p>\n\n\n\n

Mata \u00ebsht\u00eb n\u00eb k\u00ebrkim nga drejt\u00ebsia shqiptare q\u00eb prej n\u00ebntorit t\u00eb vitit 2023. SPAK e ka p\u00ebrfshir\u00eb n\u00eb hetimet e operacionit \u201cMetamorfoza\u201d, ku ai dyshohet p\u00ebr vepra penale q\u00eb lidhen me trafikun e narkotik\u00ebve, grupin e strukturuar kriminal dhe kryerjen e veprave penale n\u00eb kuad\u00ebr t\u00eb organizat\u00ebs kriminale.<\/p>\n\n\n\n

N\u00eb qend\u00ebr t\u00eb dosjes jan\u00eb disa ngarkesa t\u00eb m\u00ebdha droge t\u00eb sekuestruara n\u00eb vende t\u00eb ndryshme. Sipas t\u00eb dh\u00ebnave t\u00eb hetimit t\u00eb raportuara m\u00eb her\u00ebt, b\u00ebhet fjal\u00eb p\u00ebr kat\u00ebr episode: 446 kilogram\u00eb kokain\u00eb t\u00eb sekuestruara n\u00eb Holand\u00eb m\u00eb 5 janar 2021; 69 kilogram\u00eb kokain\u00eb t\u00eb kapura n\u00eb Brazil m\u00eb 18 shkurt 2021; 166 kilogram\u00eb marijuan\u00eb t\u00eb nisura nga Spanja drejt Gjermanis\u00eb; si dhe 250 kilogram\u00eb kokain\u00eb t\u00eb nisura nga Brazili drejt aeroportit t\u00eb Frankfurtit n\u00eb Gjermani.<\/p>\n\n\n\n

N\u00eb total, hetimet lidhen me 931 kilogram\u00eb l\u00ebnd\u00eb narkotike t\u00eb sekuestruara n\u00eb episode t\u00eb ndryshme. Sipas SPAK, grupi i dyshuar kishte aktivitet n\u00eb trafikun e kokain\u00ebs nga vende t\u00eb Amerik\u00ebs s\u00eb Jugut, p\u00ebrfshir\u00eb Ekuadorin, Kolumbin\u00eb dhe Brazilin, drejt vendeve t\u00eb Bashkimit Europian. Hetimi p\u00ebrfshiu bashk\u00ebpunimin dhe t\u00eb dh\u00ebna t\u00eb autoriteteve ligjzbatuese t\u00eb disa vendeve europiane.<\/p>\n\n\n\n

Nj\u00eb rol t\u00eb r\u00ebnd\u00ebsish\u00ebm n\u00eb hetim kan\u00eb pasur edhe komunikimet e zhvilluara n\u00eb aplikacionin e koduar Sky ECC. Sipas t\u00eb dh\u00ebnave t\u00eb dosjes t\u00eb raportuara m\u00eb her\u00ebt, komunikimet e administruara nga hetuesit e p\u00ebrfshijn\u00eb Mat\u00ebn n\u00eb nj\u00eb episod q\u00eb lidhet me transportimin e 250 kilogram\u00ebve kokain\u00eb nga Brazili drejt Frankfurtit.<\/p>\n\n\n\n