Turizmi i naftës sjell sërish në Durrës “Perlën e zezë”, një nga jahtet më të mëdha dhe më të bukura në botë. Superjahti mbërriti të hënën në portin detar të Durrësit për të përfituar nga lehtësitë që ofron vendi ynë për furnizimin me karburant dhe hyrjen në kufi për shtetasit e huaj. “Perla e zezë” qëndroi deri në mbrëmje në portin më të madh të vendit dhe pasi u furnizua me naftë në çmimin e bursës, 1 euro për litër, vijoi lundrimin e saj drejt ujërave dalmate.
I ndërtuar në vitin 2018, superjahti me vela dhe 106.7 metra i gjatë ka qenë në pronësi të miliarderit rus Oleg Burlakov, i cili vdiq nga kovidi në qershor të vitit 2021. Pas vdekjes, bashkëshortja e tij e shiti jahtin i cili aktualisht zotërohet nga një kompani jahtesh turistike qipriote e cila i jep me qira ato.
Shqipëria ka hequr taksat për jahtet dhe anijet e huaja turistike që lundrojnë në Mesdhe, duke e kthyer vendin tonë në një mundësi të artë për të ulur kostot e lundrimeve të qejfit për të huajtë, si një mënyrë tërheqjeje për të njohur vendin tonë dhe bërë atë pjesë të ndalesave të tyre.
@zërionline
