Komisioni Qendror i Zgjedhjeve i hoqi Fredi Belerit mandatin si kryetar i zgjedhur i Bashkisë së Himarës, pas dënimit me burg, duke i hapur dritën jeshile zhvillimit të zgjedhjeve të reja. Beleri pritet të ankimojë vendimin, por kryeministria kaq ka pritur për t’iu drejtuar Presidentit me kërkesën për shpalljen e datës së zgjedhjeve të pjesshme.
Në mbledhjen e sotme të KQZ-së ku ishte i pranishëm dhe Beleri, i dënuar me 2 vite për korrupsion zgjedhor nga Apeli i GJKKO-së, kryekomisioneri Ilirjan Celibashi shpalli pavlefshmërinë e mandatit të tij.
Kreu i shtetit Bajram Begaj, sipas Kodit Zgjedhor, pas marrjes njoftim duhet të shpallë zgjedhjet e parakohshme jo më parë se 30 ditë dhe jo më vonë se 45 ditë nga shpallja e vakancës. Ndërkohë brenda 30 ditëve, Beleri ka kohë të ankimojë vendimin e KQZ-së në KAS, ndërsa kreu i PBDNJ-së Vangjel Dule paralajmëroi se beteja ligjore do të vazhdojë më tej pasi ky vendim sipas tij është i diktuar politikisht.
Ndërkohë ky proces ka nxitur një debat të ri nëse procedura kërkonte që pas dënimit Beleri të shkarkohej dhe të niste procesi për zgjedhjet e reja për kryebashkiak, por për këtë ai duhej të ishte betuar më parë, apo mandati i tij të shpallej i pavlefshëm.
@zërionline
