Një 21-vjeçar në Sarandë është arrestuar nga Policia si bashkëpunëtor i dy të shpallurve në kërkim, Griseld Taullajt dhe Xhafer Bajos, të cilët në shkurt të këtij viti, vunë tritol në makinën e Mirash Gjikolës.Në banesën në Shëndëlli të Ignasjo Kasos, policia ka sekuestruar një pistoletë me fishekë.
57-vjeçari nga Lezha dhe banim në një fshat të Konispolit, Mirash Gjikola, gjeti një sasi lënde eksplozive në sediljen e makinës ndërsa lëvizte në rrugën Shëndëlli-Vrinë mëngjesin e 5 shkurtit.
Fatmirësisht lënda eksplozive nuk shpërtheu, teksa nuk kishte funksionuar lidhja mes kapsollit dhe gjashtë kallëpeve të tritolit, montuar në sediljen e pasme të automjetit të Gjikolës.
Për këtë ngjarje, Policia ka shpallur më herët në kërkim Griseld Taullajn, i dyshuar për sigurimin e numrit telefonik që do të përdorej për aktivizimin në distancë të eksplozivit, si dhe Xhafer Bajon, i dyshuar si autori kryesor i vendosjes së lëndës plasëse në automjet.
Ndaj tre të dyshuarve rëndojnë akuzat për “Vrasje me paramendim”, mbetur në tentativë, kryer në bashkëpunim, si dhe për armëmbajtje pa leje.
©ZëriOnline
