Prokuroria e Durrësit ka zbuluar detaje shqetësuese në lidhje me eksportin e 816 ton mbetje të rrezikshme nga Shqipëria drejt Tajlandës, një operacion që ka shmangur asgjësimin e mbetjeve toksike të krijuara pas riciklimit të çelikut. Ky skandal, i cili ka sfiduar ligjet vendase dhe konventat ndërkombëtare, ka ngritur alarmin për pasojat e rënda për mjedisin dhe shëndetin e njeriut.
Hetimet e nisura më 16 gusht, menjëherë pasi lajmi u bë publik, kanë zbuluar se kompania përgjegjëse për eksportin e këtyre mbetjeve është “Sokolaj”, e cila kishte blerë mbetjet nga kompania KURUM, një ndërmarrje e mirënjohur për përpunimin e çelikut në Shqipëri. Drejtoresha ekzekutive e “Sokolaj”, Gjovana Sokolaj, ka pranuar në dëshminë e saj para prokurorisë se dy ngarkesat e nisura drejt Tajlandës, njëra prej të cilave u bllokua në portin e Singaporit, ishin blerë nga KURUM si oksid hekuri. Megjithatë, dokumentet e sekuestruara nga prokuroria tregojnë se kjo lëndë dyshohet të jetë pluhur furrash çeliku, një mbetje shumë e rrezikshme për shkak të pranisë së lartë të kadmiumit dhe kromit.
KURUM, nga ana e saj, ka pranuar se ka shitur ngarkesën tek “Sokolaj”, duke deklaruar se ajo ishte oksid hekuri, por është e paqartë nëse kjo kompani ka qenë e vetëdijshme për rrezikshmërinë e lëndës që po transportonte. Sipas dokumentacionit të doganës, ngarkesa ishte klasifikuar si lëndë rifuxho, gjë që shmangu kontrollin e rreptë doganor, duke ngritur dyshime për mosrespektimin e standardeve të kërkuara për transportin e mbetjeve të rrezikshme.
Anijet transoqeanike që po transportonin ngarkesën drejt Tajlandës janë identifikuar si “Campton” dhe “Candor”, të operuara nga operatori ndërkombëtar Maersk.
Maersk ka deklaruar se ngarkesa prej 100 kontejnerësh, që po transportohej nga anijet e saj, do të rikthehet në Shqipëri. Kjo ngre një problem të madh për fatin e tyre, pasi nuk është e qartë nëse Shqipëria, konkretisht kompania turke KURUM në këtë rast, disponon infrastrukturën e nevojshme për asgjësimin e këtyre mbetjeve sipas standardeve ndërkombëtare.
Prokuroria e Durrësit, nën drejtimin e Suela Belulit, po heton për akuzat e “Kontrabandës me mallra të ndaluara ose të kufizuara”, “Transportim i mbetjeve toksike” dhe “Shpërdorim të detyrës”, duke u përqendruar në rolin e institucioneve përgjegjëse dhe zyrtarëve të tyre në këtë skandal. Hetimet janë zhvilluar në bashkëpunim të ngushtë me OLAF dhe institucione të tjera ndërkombëtare, dhe pritet të zbardhin edhe raste të tjera të ngjashme të transportit të paligjshëm të mbetjeve.
Ndërsa hetimet vazhdojnë, një pyetje kryesore mbetet nëse vendi ynë është i përgatitur për t’u përballur me sfidën e asgjësimit të këtyre mbetjeve të rrezikshme dhe çfarë masash do të ndërmerren për të parandaluar përsëritjen e rasteve të tilla në të ardhmen.
©️zërionline
