Detaje të reja janë mësuar nga plagosja me thikë e ndodhur mbrëmjen e sotme pranë gjimnazit “Petro Nini Luarasi” në Tiranë. I plagosuri, Kreshnik Cara, 49 vjeç, ndodhet në spital në gjendje kritike për jetën, ndërsa Policia ka arrestuar autorin e ngjarjes.
Gjendja shëndetësore e Kreshnik Carës, i cili u plagos me thikë mbrëmjen e sotme pranë gjimnazit “Petro Nini Luarasi” në Tiranë, paraqitet e rëndë.
Sipas gazetares Xhensila Kodra, Cara ndodhet i shtruar në spital dhe është në gjendje kritike për jetën, pasi ka marrë disa goditje me thikë në pjesën e barkut.
Ndërkohë, ka një zhvillim të ri edhe nga hetimet për ngjarjen. Policia ka arrestuar autorin e plagosjes, i cili fillimisht ishte larguar nga vendngjarja dhe ishte shpallur në kërkim.
Ngjarja ndodhi mbrëmjen e sotme pranë gjimnazit “Petro Nini Luarasi”. Policia po vijon veprimet për zbardhjen e plotë të rrethanave dhe motivit të konfliktit që përfundoi me plagosjen e Carës.
