Një kontroll rutinë i policisë në Kalbe të Gjermanisë ka çuar në zbulimin e një plantacioni të madh kanabisi, të ngritur brenda një godine të pabanuar. Në pranga kanë përfunduar dy shtetas shqiptarë, 32 dhe 56 vjeç.
Ngjarja ndodhi pasditen e 2 tetorit, kur efektivët që patrullonin në zonë vunë re një erë të fortë kanabisi që vinte nga një objekt në rrugën Breiten Weg.
Policët dyshuan se brenda godinës mund të zhvillohej aktivitet i paligjshëm dhe vendosën të kryenin një kontroll. Brenda objektit ata zbuluan rreth 800 bimë kanabisi, të cilat ndodheshin në faza të ndryshme të rritjes.
Në ambientet e godinës ndodheshin edhe dy shqiptarët, 32 dhe 56 vjeç, të cilët u ndaluan menjëherë nga policia.
Të dy të dyshuarit dolën para gjykatës më 3 tetor, pas kërkesës së Prokurorisë së Stendalit. Gjykata vendosi paraburgimin e tyre dhe më pas ata u dërguan në institucionet penitenciare.
Autoritetet gjermane nuk kanë bërë ende publike detaje mbi mënyrën se si ishte organizuar plantacioni, personat që qëndrojnë pas aktivitetit apo rolin konkret të dy shqiptarëve.
Hetimet vijojnë për të zbardhur të gjithë aktivitetin dhe për të përcaktuar nëse ka persona të tjerë të përfshirë në kultivimin e kanabisit.
©ZëriOnline
