Ish-shefi i repartit zjarrfikës në Mallakastër, Armand Aliaj, është dhunuar me levë nga persona të maskuar mëngjesin e sotëm në Ballsh, teksa ndodhej i vetëm në lokalin e tij.
Sulmi ndodhi rreth orës 07:00. Sipas dëshmisë së Aliajt, ai sapo kishte përgatitur kafen e mengjesit kur autorët e goditën nga pas, pa i thënë asnjë fjalë. Pas sulmit, ata u larguan me një automjet tip “Audi Q5”.
Aliaj ka shkuar vetë në spitalin e Ballshit, ku mori ndihmën e parë mjekësore. Ai ka pësuar dëmtime në ballë, duar dhe shpatull. Më pas, u transportua në Spitalin Rajonal të Fierit për ekzaminime të mëtejshme. Gjendja e tij shëndetësore raportohet e qëndrueshme.
Në dëshminë e dhënë, Aliaj ka deklaruar se nuk ka konflikte me askënd. Ende nuk dihen motivet e sulmit, ndërsa policia po heton për identifikimin e autorëve dhe zbardhjen e rrethanave të ngjarjes.
©ZëriOnline
