Në Gjykatën e Durrësit po zhvillohet këtë të diel seanca për caktimin e masave të sigurisë për 22 protestuesit e arrestuar pas përplasjeve të dhunshme të së enjtes, ditën e parë të protestës në qytet.
Seanca është ndërprerë për t’u dhënë kohë avokatëve të njihen me aktet e dosjes. Për shkak të numrit të lartë të të arrestuarve, pritet që seanca të zgjasë për disa orë. Masat e sigurisë do të caktohen nga gjyqtari Orgent Nazaj.
Të arrestuarit akuzohen në lidhje me episodet e dhunshme të regjistruara gjatë protestës, ku pati përplasje mes protestuesve dhe efektivëve të policisë, me hedhje gurësh dhe sendesh të forta. Gjatë incidenteve mbeti i lënduar në kokë edhe nëndrejtori i policisë Idriz Daullja.
Mes 22 personave të arrestuar është edhe Ndrec Pjetri, ish-kandidat i opozitës për deputet dhe Orest Berberi, aktivist i opozitës.
Ndërkohë, një ditë më parë u zhvilluan veçmas seancat për dy të miturit e arrestuar gjatë së njëjtës protestë. Për të dy u caktua masa e detyrimit për t’u paraqitur në policinë gjyqësore, por gjykata mbajti qëndrime të ndryshme për ligjshmërinë e arrestimit: për njërin e vlerësoi arrestimin të paligjshëm, ndërsa për tjetrin të ligjshëm.
©ZëriOnline
