Këtë fundjavë, qyteti i Durrësit u shndërrua në një qendër të rëndësishme kulturore me organizimin e Festivalit “Liri dhe Transformim”, një event që bëri bashkë disa nga personalitetet më të njohura nga bota e letërsisë, filozofisë, gazetarisë dhe historisë. Ky festival, i kuruar nga studiuesja dhe shkrimtarja e njohur ndërkombëtarisht, Lea Ypi, u zhvillua si pjesë e Javës Kulturore Britanike dhe organizohet nga British Council, me mbështetjen e Ministrisë së Ekonomisë, Kulturës dhe Inovacionit.
Ndër të ftuarit specialë ishin ambasadori i Britanisë së Madhe në Shqipëri, Nick Abbott, dhe organizatorja e EA Freedom Festival, Joanne Ooi. Së bashku me ta, në panelet e festivalit morën pjesë personalitete të njohur si Noel Malcolm, Olivia Sudjic, Shami Chakrabarti dhe Misha Glenny, të cilët zhvilluan diskutime të thelluara mbi letërsinë, politikën, historinë, artin dhe shoqërinë. Festivalit iu bashkuan pjesëmarrës nga Shqipëria dhe jashtë, duke bërë të mundur një shkëmbim të pasur idesh dhe përvojash.
Eventi i zhvilluar në Durrës nuk ishte thjesht një ngjarje kulturore, por një festë idesh dhe reflektimesh mbi tematika të thella si të drejtat e njeriut, gjeopolitika dhe krijimtaria. Me diskutime të hapura dhe ligjërata inspiruese, festivali ofroi një platformë për të gjithë ata që janë të interesuar në fushat e historisë, poezisë dhe filozofisë. Një nga momentet kulmore të festivalit ishte ligjërimi i Lea Ypit, një nga mendimtaret më të spikatura shqiptare të momentit, e cila ndau reflektime mbi rolin e lirisë dhe transformimit në botën e sotme.
Për të gjithë ata që nuk arritën të jenë pjesë e aktivitetit në Durrës, festivali vazhdoi me sesione të tjera të dielën në Tiranë.
“Liri dhe Transformim” ishte një mundësi për të thelluar njohuritë mbi kulturën dhe historinë, ndërsa i ofron publikut një hapësirë për dialog dhe mendim kritik.
Ky festival ndërkombëtar përfaqëson një tjetër moment të rëndësishëm për qytetin e Durrësit, duke e kthyer atë në një pikë kyçe të jetës kulturore në rajon.
©️zërionline
