Policia e Tiranës ka arrestuar Robert Dukën, 50 vjeç, me origjinë nga Vlora, si të dyshuar për grabitjen e një banke të nivelit të dytë në zonën e Komunës së Parisit.
Efektivët e policisë e lokalizuan dhe e arrestuan 50-vjeçarin pranë rrugës së Kosovarëve, disa ditë pas ngjarjes.
Nga të dhënat paraprake të hetimit rezulton se Duka dyshohet se ka hyrë në ambientet e bankës dhe ka kërcënuar punonjësit me armë. Pas grabitjes, ai është larguar nga vendngjarja duke përdorur një monopatinë.
Hetuesit po verifikojnë gjithashtu përfshirjen e tij në një tjetër grabitje banke, që ka ndodhur disa muaj më parë në të njëjtën zonë të kryeqytetit.
Policia vijon hetimet për të sqaruar rrethanat e të dyja ngjarjeve dhe për të dokumentuar përgjegjësinë e të arrestuarit.
Si ndodhi grabitja?
Grabitja ndodhi rreth një javë më parë, në zonën e Komunës së Parisit në Tiranë, ku një person i maskuar hyri në filialin e bankës Raiffeisen dhe mori një shumë parash nën kërcënimin e një sendi në dukje armë. Ngjarja u regjistrua rreth orës 10:45 të paradites, në një moment kur brenda ambienteve të bankës ndodheshin punonjës dhe klientë. Sapo hyri në filial, autori iu drejtua rojës së sigurisë që qëndronte pranë hyrjes dhe e kërcënoi, duke e detyruar ta shoqëronte drejt arkës.
Më pas, grabitësi iu afrua arkëtares, i drejtoi armën në kokë dhe i kërkoi t’i dorëzonte paratë. Pasi mori shumën e parave, ai doli nga banka dhe u largua me shpejtësi duke përdorur një monopatinë, me të cilën lëvizi në drejtim të stadiumit “Selman Stërmasi”.
Menjëherë pas ngjarjes, policia mbërriti në vendngjarje, ngriti pika kontrolli dhe angazhoi shërbimet për identifikimin dhe kapjen e autorit.
