Një aksident spektakolar ndodhi mëngjesin e sotëm në autostradën Tiranë-Durrës, në afërsi të Maminasit, ku dy mjete të tonazhit të rëndë u përplasën me njëri-tjetrin. Fuqia e goditjes ishte aq e madhe sa njëri prej kamionëve përfundoi në krahun e kundërt të rrugës, duke shkatërruar trafikndarësen e betonit.
Për fat të mirë, nuk raportohen persona të lënduar nga përplasja, por dëmet materiale janë të konsiderueshme. Ndërkohë, qarkullimi në këtë aks të rëndësishëm u paralizua për disa orë, duke shkaktuar radhë të gjata automjetesh.
Policia mbërriti menjëherë në vendngjarje për të rikthyer qarkullimin normal dhe për të hetuar shkaqet e aksidentit. Ky incident i shtohet listës së aksidenteve të shpeshta në këtë segment autostrade, duke ngritur edhe njëherë shqetësimin për sigurinë rrugore.
©️zërionline
