Kasandra Cani, 26 vjeçe, është arrestuar për plagosjen e Esma Verlakut, një 22-vjeçare, pas një konflikti të ndodhur në banesën e saj. Ngjarja ka ndodhur më 20 janar 2025, në orën 02:34 të mëngjesit, dhe dyshohet se është rezultat i një konflikti të nisur më herët mes Canit dhe motrave Verlaku, Esma dhe Xhemile.
Fillimisht, motrat Verlaku janë paraqitur në Komisariatin Nr. 2 në Tiranë për të denoncuar një konflikt që kishin pasur në autostradën Tiranë-Durrës, pranë Vorës. Megjithatë, ato nuk kanë dhënë detaje mbi personat e përfshirë dhe janë larguar nga komisariati vetëm pas disa minutash, pa përfunduar kallëzimin.
Pas largimit, ato dyshohet se kanë shkuar në banesën e Kasandra Canit, ku situata është përshkallëzuar në dhunë fizike. Gjatë konfliktit, Cani ka goditur Esma Verlakun me një mjet prerës, duke i shkaktuar plagë të rënda. Aktualisht, Esma ndodhet në spital nën kujdesin e mjekëve.
Policia ka arrestuar në flagrancë Kasandra Canin për akuzat e “Plagosjes së rëndë me dashje” dhe “Prodhimit, mbajtjes, blerjes apo shitjes pa leje të armëve të ftohta.” Ndërkohë, ndaj Xhemile Verlakut ka nisur procedim penal në gjendje të lirë për “Dëmtime të tjera me dashje,” “Kanosje,” dhe “Dhunim i banesës.”
Hetimet vijojnë për të zbardhur plotësisht rrethanat e ngjarjes dhe për të përcaktuar përgjegjësitë ligjore të të gjitha palëve të përfshira.
©️zërionline
