Durrësi iu bashkua sot Ditës Ndërkombëtare të Gruas me një marshim që kishte në fokus të drejtat dhe fuqizimin e grave dhe vajzave. Aktivistet e cilësuan barazinë dhe fuqizimin e grave dhe vajzave si një hap të rëndësishëm për ndërtimin e një familjeje dhe shoqërie më të sigurt.
“Gratë dhe vajzat meritojnë mundësi të barabarta dhe një mbështetje të vazhdueshme për të realizuar potencialin e tyre të plotë. Nuk është një ditë feste, por protestë ky 50-vjetor i caktimit të 8 marsit si ditë ndërkombëtare e gruas nga OKB.”, u shpreh Bajana Çeveli, drejtuese e organizatës “Gender, Paqe dhe Siguri”, aktiviste e njohur në vend për të drejtat e grave.
Marshimi nisi nga Gjykata e Durrësit dhe vijoi përgjatë bulevardit dhe shëtitores “Taulantia”, ku pati dhe qytetarë të tjerë që iu bashkuan kauzës.
Një nga pjesëmarrëset ngriti shqetësimin për mungesën e mbështetjes institucionale, veçanërisht për gratë që përballen me vështirësi ekonomike dhe dhunë në familje.
“Përballja me sfidat si mungesa e mbështetjes ekonomike, e banesave sociale për gratë e divorcuara dhe zvarritja e proceseve gjyqësore e bën edhe më të vështirë jetën e shumë grave,” u shpreh një nga protestueset.
Një tjetër grua theksoi nevojën për masa më të forta kundër dhunës: “Ne kërkojmë siguri dhe paqe brenda mureve të shtëpisë, por edhe në shoqëri.”
Sipas të dhënave zyrtare, vetëm vitin e kaluar në Durrës u lëshuan 471 urdhra të menjëhershëm mbrojtjeje, ndërsa në dy muajt e parë të këtij viti janë regjistruar 75 urdhra të rinj dhe rreth 330 procedime penale për dhunë në familje në 14 muajt e fundit.
Pjesëmarrëset kërkuan angazhim më të madh nga institucionet për të siguruar mbrojtje efektive dhe mbështetje për gratë që përballen me sfida të shumta.
V. Q.
©️zërionline
