Në një zhvillim jo të zakontë dhe pse të pritshëm në skenën politike shqiptare, kryebashkiaku i Tiranës, Erion Veliaj, i cili ndodhet në paraburgim prej shkurtit të këtij viti, ka ndryshuar vendvotimin. I detyruar ai është regjistruar si votues në Durrës për zgjedhjet parlamentare të 11 majit. I arrestuar me urdhër të SPAK-ut nën akuzat për korrupsion pasiv dhe pastrim parash, Veliaj aktualisht ndodhet në Burgun e Durrësit, aty ku për ironi të fatit pritet të ushtrojë të drejtën e tij kushtetuese për të votuar.
Përmes të dhënave të publikuara nga Komisioni Qendror i Zgjedhjeve, rezulton se emri i tij është zhvendosur zyrtarisht nga lista e zgjedhësve në Tiranë, për në atë të Bashkisë së Durrësit.
Fakti që një kryetar bashkie, ndonëse i ndaluar, ndryshon zonën zgjedhore ku voton, vë në pikëpyetje edhe pozicionin e tij si i zgjedhur, pozicion që vazhdon ta mbajë de jure. Çfarë ndikimi do të ketë vota e tij dhe ai te votuesit e tjerë në burg në rezultatin e zgjedhjeve në Qarkun e Durrësit? A do ta konsiderojë ende veten Veliaj një figurë me peshë në Partinë Socialiste dhe në radhët e elektoratit? A do të ketë ndikim edhe gjatë periudhës së paraburgimit? Si do të votojë ai dhe për kë kandidat/e?
Rasti i Veliajt është një shembull i rrallë i ndërlikimeve midis drejtësisë penale dhe të drejtës politike për përfaqësim. Prania e tij në listat e Durrësit, pikërisht aty ku ndodhet fizikisht i arrestuar, përforcon ndjesinë se politika dhe drejtësia janë përplasur në mënyrë të pazakontë në këtë prag zgjedhor.
Deri në zbardhjen përfundimtare të dosjes së tij, lëvizja e votës së Veliajt nga Tirana në Durrës nuk mbetet thjesht një detaj teknik, por një element që pritet të sjellë zhvillime të tjera teksa pasqyron tensionin mes sistemit të drejtësisë, një kryebashkiaku kryeqytetas në qeli dhe sferës politike shqiptare.
©️zërionline
