Në një deklaratë me tone kritike ndaj pushtetit vendor dhe qendror, kandidati i Lëvizjes Bashkë në Durrës, urbanisti Artan Kacani, ka reaguar këtë 7 Prill, ditë e cila përkujton rezistencën ndaj pushtimit fashist. Duke folur nga sheshi përballë bustit të Mujo Ulqinakut, Kacani theksoi se kjo datë dikur i përkiste popullit, por sot është përvetësuar nga pushteti.
“Përfaqësuesit e qeverisë vijnë çdo vit me lule në dorë dhe fjalë të zbrazëta në gojë. Me të njëjtën lehtësi që hedhin kurorën, firmosin për betonizimin e qytetit, duke shuar vendet e kujtesës dhe rezistencës,” tha ai.
Kacani kritikoi projektet e qeverisë në Durrës, duke përmendur kullat, projektin “Veliera” dhe rrënimin e ndërtesave historike si shembuj të një pushteti që, sipas tij, e ka shndërruar qytetin në një makineri ndërtimi në funksion të klientelës.
“Ky nuk është më një shesh publik. Është një fasadë pushteti. Një shembull i qartë sesi Partia Socialiste është shkëputur nga idealet e së majtës,” u shpreh ai.
Duke iu referuar figurës së Mujo Ulqinakut, heroit që i doli përballë pushtuesve fashistë, Kacani theksoi se ai nuk ishte simbol i ceremonive, por i veprimit. “Ai përfaqëson guximin qytetar, jo protokollet boshe të një qeverie që nuk ka më asgjë të përbashkët me idealin e së majtës.”
Në përfundim, kandidati i Lëvizjes Bashkë theksoi se 7 Prilli i përket atyre që rezistojnë dhe jo atyre që shfrytëzojnë kujtesën historike për përfitime politike.
“Ne jemi këtu për të ndërtuar një shoqëri të ndershme, mbi drejtësi, solidaritet dhe guxim politik. Ky nuk është fundi i historisë, është fillimi i një rezistence të re.”
©️zërionline
