Skulptura urbane “Peshkatari”, e vendosur në shëtitoren bregdetare të Durrësit, pranë “Sfinksit”, është dëmtuar sërish, duke ngritur shqetësime të mëdha për ruajtjen e trashëgimisë artistike dhe sigurinë e veprave në hapësirat publike.
E realizuar nga skulptori Dylber Neziri dhe e vendosur buzë detit që prej vitit 2016, kjo vepër është kthyer në simbol të zonës turistike. Por për fat të keq, ajo është gjithashtu një nga skulpturat më të dëmtuara të qytetit. Pavarësisht restaurimeve të përsëritura, hera e fundit vetëm disa muaj më parë dhe më pas u rivendos në vendin e vet nga Agjencia e Parqeve Urbane, “Peshkatari” nuk ka mundur t’i shpëtojë veprimeve të vazhdueshme vandaliste.
Mbrëmjen e kaluar, vepra u dëmtua sërish. Ky incident ndodh vetëm një muaj pas dëmtimit të dy skulpturave të tjera urbane në qytet, Tina Turner dhe John Lennon, pjesë e kompleksit artistik urban në shëtitoren “Taulantia”.
Dëmtimet e vazhdueshme të këtyre veprave ngrenë një problem serioz për mungesën e mbrojtjes fizike, vëzhgimit dhe ndëshkueshmërisë ndaj vandalëve. Po ashtu, ato theksojnë nevojën për një ndërgjegjësim më të madh qytetar për rolin e artit publik, që jo vetëm zbukuron hapësirat urbane, por ruan edhe identitetin dhe kujtesën kolektive të qytetit.
©️zërionline
