Në një kohë kur produktiviteti dhe efikasiteti janë bërë prioritet i përditshëm, një studim i rëndësishëm hedh dritë mbi koston e fshehur të presionit në vendin e punës, shëndetin tonë. Hulumtimi i realizuar nga Dr. Jeffrey Pfeffer nga Universiteti i Stanfordit dhe Dr. Joel Goh nga Universiteti i Harvardit, i publikuar në revistën “Behavioral Science & Policy”, tregon se stresi i lidhur me punën mund të ketë pasoja serioze, madje të ndikojë në jetëgjatësinë e individit.
Duke analizuar të dhënat e 228 studimeve të ndryshme, studiuesit identifikuan disa faktorë kryesorë që ndikojnë negativisht në mirëqenien fizike dhe mendore të punonjësve: oraret e zgjatura, mungesa e kontrollit mbi detyrat dhe pasiguria në vendin e punës. Rezultatet janë alarmante:
- Punonjësit që përballen me pasiguri në punë kanë 50% më shumë gjasa të raportojnë probleme shëndetësore.
- Kërkesat e larta të punës rrisin me 35% rrezikun për zhvillimin e sëmundjeve.
- Orari i gjatë i punës lidhet me një rritje prej afërsisht 20% të rrezikut për vdekshmëri të parakohshme.
Edhe pse studimi nuk ofron një krahasim të drejtpërdrejtë, autorët paralajmërojnë se ndikimi i një ambienti pune toksik mund të jetë po aq i rrezikshëm sa ekspozimi ndaj tymit pasiv. Në disa raste, madje edhe më i dëmshëm se vetë pirja e duhanit.
Puna nuk duhet të jetë një burim rreziku për jetën. Ky studim përçon një mesazh të fuqishëm: përmirësimi i kushteve të punës dhe mbrojtja e shëndetit mendor nuk janë thjesht çështje komoditeti apo rehatie, por janë vendime thelbësore për shëndetin dhe jetëgjatësinë e çdo individi.
©️zërionline
