Me fjalët “një ëndërr që bëhet realitet”, Myftiu i Shkodrës, Imam Muhamed Sytari, përshkroi emocionin e inagurimit të Xhamisë së Plumbit, një prej monumenteve më të veçanta të trashëgimisë kulturore dhe fetare në vend. Pas një periudhe të gjatë restaurimi, ky objekt kulti u përurua sot në një ceremoni solemne, me praninë e personaliteteve të njohura dhe Ambasadorit të Turqisë në Shqipëri, Tayyar Kağan Atay.
“Rikthimi i dinjitetit të këtij objekti unik në Ballkan na bën krenarë të gjithëve”, – u shpreh kryetari i Bashkisë së Shkodrës, Benet Beci, duke theksuar rëndësinë e ruajtjes së vlerave historike dhe shpirtërore të qytetit.
Ambasadori turk në Tiranë vlerësoi restaurimin si një fryt bashkëpunimi mes dy qeverive, duke nënvizuar mbështetjen e vazhdueshme të Turqisë për ruajtjen e trashëgimisë osmane në Shqipëri.
Xhamia e Plumbit, e ndërtuar në vitin 1773 pranë hyrjes së Kalasë së Rozafës, është një perlë arkitekturore që mishëron elegancën e stilit klasik osman. Me kupolën e saj të mbuluar me plumb, nga e cila mori edhe emrin, dhe minaren e hijshme që ngrihet mbi peizazhin historik të Shkodrës, kjo xhami ka qenë përherë një simbol i identitetit kulturor të qytetit.
Pas dekadash dëmtimesh nga përmbytjet dhe erozioni i kohës, restaurimi i saj përfaqëson jo vetëm një arritje arkitekturore, por edhe një mesazh të fortë të bashkëjetesës fetare dhe ruajtjes së trashëgimisë. Sot, Xhamia e Plumbit qëndron më e bukur se kurrë, si një dëshmi e gjallë e shpirtit të Shkodrës që sfidon kohën.
©️zërionline
