Hetimet ndaj ish-kryebashkiakut të Kavajës Elvis Rroshi për shpërdorim detyre do të vazhdojnë. Ndonëse prokuroria e Durrësit ka kërkuar pushimin e ccështjes ndaj tij dhe gjykata e Durrësit vendosi që për moskompetencë lëndore ta pranojë kërkesën, Gjykata e Posaçme për Korrupsionin dhe Krimin e Organizuar me një vendim ka urdhëruar Prokurorinë e Posaçme që të tërheqë dosjen ndaj Elvis Roshit, ish – kryetarit të bashkisë së Kavajës dhe të vijojë hetimet për shpërdorim detyre. Rroshi u kallëzua në vitin 2017 nga KLSH për dy tendera abuzivë me vlerë 33 milionë lekë, por prokuroria e Durrësit kërkoi pushim të hetimeve dhe delegim të dosjes në Gjykatën e Posaçme.
Njoftimi i plotë i GJKKO-së:
“Në Gjykatën e Posaçme të Shkallës së Parë për Korrupsionin dhe Krimin e Organizuar në datë 30.11.2023, është regjistruar kërkesa penale me nr. 23/113 akti, ardhur për shkak të deklarimit të mos kompetencës lëndore nga Gjykata e Shkallës së Parë të Juridiksionit të Përgjithshëm Durrës, me objekt: “Pushimin e procedimit penal nr. 317 të vitit 2017, të regjistruar pa autor për veprën penale “Shpërdorim i detyrës”, parashikuar nga neni 248 i K.Penal”, me palë kërkuese Prokuroria pranë Gjykatës së Shkallës së Parë të Juridiksionit të Përgjithshëm Durrës dhe kallëzues Kontrolli i Lartë i Shtetit.
Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarja Rudina Palloj, bazuar në nenet 112, 75/a, 128, 128/a, 329, 329/a, 329/b e vijues të Kodit të Procedurës Penale, me vendimin nr. 23, datë 26.03.2024, vendosi:
Konstatimin e pavlefshmërisë absolute të kërkesës së Prokurorisë pranë Gjykatës së Shkallës së Parë të Juridiksionit të Përgjithshëm Durrës, me objekt: Pushimin e procedimit penal nr.317 të vitit 2017, të regjistruar për veprën penale “Shpërdorim detyre” parashikuar nga neni 248 të K. Penal.
Kalimin e akteve që ndodhen pranë kësaj gjykate, të përcjella nga Gjykata e Shkallës së Parë e Juridiksionit të Përgjithshëm Durrës, për vijimin e hetimeve, Prokurorisë së Posaçme Kundër Korrupsionit dhe Krimit të Organizuar.
Kundër këtij vendimi palët kanë të drejtën e ankimit brenda 15 ditëve nga e nesërmja e komunikimit të vendimit të arsyetuar në Gjykatën e Posaçme të Apelit për Korrupsionin dhe Krimin e Organizuar.”
©zërionline
