Një aksident është regjistruar mesditën e kësaj të marte në lagjen nr. 10 të qytetit të Korçës, në zonën e njohur si “Dritat e Verdha”, ku një automjet ka përplasur karrocën me një fëmijë 1 vjeç e gjysmë.
Mësohet se, teksa një nënë po kalonte rrugën së bashku me fëmijën e saj, automjeti ka goditur karrocën ku ndodhej i mituri.
Menjëherë pas aksidentit, drejtuesi i mjetit ka ndaluar dhe ka transportuar vetë fëmijën drejt Urgjencës së Spitalit të Korçës, ku ai mori ndihmën e nevojshme mjekësore.
Burime nga spitali bëjnë me dije se 1-vjeçari ndodhet jashtë rrezikut për jetën dhe gjendja e tij shëndetësore është e stabilizuar.
Në vendngjarje mbërritën shërbimet e Policisë, të cilat kryen veprimet e para procedurale. Grupi hetimor po punon për të sqaruar dinamikën e aksidentit, duke administruar provat dhe dëshmitë, ndërsa ndaj drejtuesit të automjetit kanë nisur procedurat përkatëse. Hetimet vijojnë për të përcaktuar shkaqet dhe përgjegjësitë e këtij aksidenti.
©ZëriOnline
