Dhoma e Avokatisë Durrës paralajmëron bojkot të të gjitha seancave gjyqësore nga kjo e hënë, 3 qershor deri më 7 qershor.
Sipas informacioneve, ky vendim është marrë pasi avokatët nuk lejohen të hyjnë në gjykatë, por të presin jashtë me palët dhe me kundërshtarët, situatë e cila mund të shkaktojë konflikt mes palëve. “Po denigrohet figura e avokatit ndaj ndodhin dhe ngjarje të rënda. Gjykata po krijon një trajtim tê pabarabartë mes palëve”, shprehen avokatët durrsakë.
“Pas ezaurimit të të gjitha mundësive për zgjidhjen e problemit së lënies së Avokatëve jashtë ambienteve të Gjykatës Shkallës Parë Juridiksioni i Përgjithshëm Durrës, si dhe mbledhjes së jashtëzakonshme të anëtarëve të Dhomës së Avokatisë Durrës, Kryesisë së Dhomës dhe Komitetit Drejtues, Dhoma e Avokatisë Durrës ka marrë vendimin për: “…Bojkotimin e të gjitha seancave gjyqësore civile dhe penale”.
Përjashtim nga ka ky bojkotim bëjnë pjese vetëm seancat gjyqësore për masat e sigurimit, zëvendësimin dhe shuarjen e tyre. Ky vendim ka efekt për datat 03.06.2024 – 07.06.2024, periudhë gjate ose pas së cilës dhoma do të dalë me një vendim të ri.
Sqarojmë se të gjithë avokatët të cilët do të rezultojnë se kanë marrë pjesë në seancat gjyqësore për të cilat me këtë vendim është bërë bojkotimi i tyre, Komiteti i Disiplinës do fillojë procedim administrativ ndaj tyre”, shkruhet në vendimin e marrë nga Dhoma e Avokatisë Durrës e drejtuar nga avokati Lorval Petani.
©️zërionline
*Ripublikimi i materialeve tona lejohet vetëm nëse bëhet citimi i autorit, burimit origjinal.
