Merr fund fati i vulës dhe logos së demokratëve që tre vitet e fundit janë endur dyerve të gjykatave dhe janë përballur me një mori akuzash e kundërakuzash në përpjekje për të zotëruar vulën. E gjithë situata e krijuar erdhi si pasojë e copëzimit të Partisë Demokratike dhe qëndrimit pro dhe kundër liderit historik Sali Berisha.
Gjykata e Apelit gjatë seancës së 11 qershorit pasi u tërhoq në dhomën e Këshillimit vendosi që vula e Partisë Demokratike t’i kalojë grupimit të Rithemelimit me përfaqësues Sali Berishën. Kjo gjykatë vendosi mos pranim të ankimimit të Enkelejd Alibeajt me vendim unanim nga të treja gjyqtaret.
Trupa gjykuese e përbërë nga Alma Ahmeti, Iliba Bezati dhe Elona Toro nuk pranuan ankimimin, duke lënë në fuqi vendimin e gjykatës së Shkallës së Parë të marrë nga gjyqtari Agron Zhukri, që përcaktonte se vula i takon Rithemelimit të Berishës.
Në dhjetor të vitit të kaluar Gjykata e Lartë riktheu për rishqyrtim vendimin e dhënë nga Agron Zhukri që njihte si kryetar të Partisë Demokratike Sali Berishën. Në arsyetimin e dhënë nga gjykata e Lartë theksohet se janë bërë shkelje proceduriale duke u interpretuar gabim normat dhe ligji procedurial.
Ndërkohë pritet se ç’vendim do të marrë Basha dhe mbështetësit e tij pas vendimit të Apelit. Një emër i ri me një logo dhe vulë të re pritet të lindë në spektrin politik shqiptar, ndërsa viti i ardhshëm nuk është larg dhe gara elektorale nën një sigël të re nuk e favorizon aspak partinë që humbi vulën me vendim gjykate.
©️zërionline
*Ripublikimi i materialeve tona lejohet vetëm nëse bëhet citimi i autorit, burimit origjinal.
