Klubi i librit “Gjergj Vlashi” ka përmbyllur sezonin e tij me një aktivitet të veçantë, të zhvilluar gjatë një udhëtimi me anije përgjatë brigjeve të Durrësit. “Det dhe poezi” ishte tema e takimit të fundit për këtë sezon, ku çdo anëtar i klubit kishte përzgjedhur poezi nga autorë të ndryshëm, të cilat i lexuan në një ambient magjepsës detar.
Kodi i veshjes për këtë event ishte bluza e marinarit, një detaj që u respektua nga të gjithë të pranishmit, duke krijuar një atmosferë harmonike dhe të përshtatshme për temën që ishte filli përbashkues i të gjithë elementeve të takimit.
Leximi i poezive në sfondin e valëve dhe erës së freskët të detit, si dhe interpretimit të instrumentistëve durrsakë Eduart Tereziu në kitarë dhe Mira Peku në violinë, e bëri këtë takim të paharrueshëm për anëtarët e klubit.
I drejtuar nga Teuta Dhima, kjo nismë e bukur e klubit u realizua me kontributin e veçantë të çiftit Artion dhe Pranvera Beqiraj, si dhe bashkëpunimin aktiv të disa anëtareve të tjera të klubit, që u kujdesën veç të tjerash dhe për detaje të një udhëtimi plot shije. Ky takim poetiko-detar dëshmoi përkushtimin dhe kreativitetin e Klubit të Librit “Gjergj Vlashi” në promovimin e kulturës dhe letërsisë së mirë, duke bërë bashkë artin e poezisë me bukurinë e natyrës detare dhe perëndimin magjik të diellit mbi Adriatik.
Prania e disa përfaqësuesve të brezit të ri në takimin në anije, ashtu si dhe në takime të tjera përgjatë vitit, i jep një tjetër dimension aktivitetit të klubit të librit, atë të misionarit që transmeton vlera dhe dashuri për librin dhe magjinë e tij në formimin individual dhe shoqëror.
@zërionline
