Pas katër muajsh hetime intensive me metoda proaktive, Policia vendore nën drejtimin e Prokurorisë së Durrësit ka finalizuar operacionin “Rent”, duke zbuluar një ambient të përshtatur për prostitucion në lagjen nr. 1 të qytetit. Në kuadër të këtij operacioni janë arrestuar tre persona dhe janë shpallur në kërkim tre të tjerë.
Policia e Durrësit, në bashkëpunim me Seksionin për Hetimin e Krimeve dhe Trafiqeve të Paligjshme, arrestoi në flagrancë shtetasit Andi Rroshi, 33 vjeç, Marjana Doko, 25 vjeçe dhe Feride Protoduari, 25 vjeçe, të gjithë banues në Tiranë. Ndërkohë, shtetasit A. S., 42 vjeç, M. R., 30 vjeç dhe K. M., 24 vjeçe, po ashtu banues në Tiranë, janë shpallur në kërkim.
Gjatë kontrollit në ambientin e marrë me qira në lagjen nr. 1, policia gjeti dhe sekuestroi një shumë parash, që dyshohet të jetë përfituar nga veprimtaria kriminale, si dhe tre celularë. Sipas hetimeve, ambienti ishte përshtatur për ushtrimin e prostitucionit nga M. Doko, F. Protoduari dhe 24-vjeçarja në kërkim K. M., të organizuar nga A. Rroshi dhe dy shtetasit në kërkim M. R. dhe A. S.
Materialet procedurale i janë dorëzuar Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme. Të arrestuarit akuzohen për veprat penale “Prostitucioni”, “Shfrytëzimi i prostitucionit” dhe “Mbajtja e lokaleve për prostitucion”, të kryera në bashkëpunim.
@zërionline
