Një autobot karburanti ka shpërthyer në flakë në një pikë karburanti në autostradën Durrës-Tiranë, duke lënduar dy persona. Incidenti ka ndodhur rreth orës 14:00, kur automjeti që transportonte karburant u përfshi nga flakët.
Policia bën me dije se të lënduarit janë Xh.K., 20 vjeç, banues në Kamëz, dhe E.P., rreth 35 vjeç, të dy punonjës të pikës së karburantit. Ata janë dërguar menjëherë në spital për ndihmë mjekësore.
Falë ndërhyrjes së shpejtë të shërbimeve zjarrfikëse dhe policisë, flakët u izoluan, duke shmangur përfshirjen nga zjarri të cisternave të tjera me karburant. Policia evakuoi me shpejtësi personat e tjerë që ndodheshin në zonën e rrezikut.
Zjarri u shuajt plotësisht dhe trafiku në të dy drejtimet e autostradës po vazhdon normalisht. Grupi hetimor shkoi në vendngjarje dhe po punon për zbardhjen e rrethanave të incidentit. Autoboti me targa AA 627 IC është djegur plotësisht.
@zërionline
