Falë reagimit të shpejtë policor janë zbardhur vjedhjet e tre automjeteve që ndodhën një ditë më parë në Durrës. Operacioni i koduar “Three,” i realizuar nga Komisariati i policisë Durrës dhe Stacioni i policisë Plazh, rezultoi në arrestimin e katër personave të dyshuar si autorë të këtyre vjedhjeve.
Sipas Policisë, dy nga të arrestuarit u prezantuan si punonjës parkingu për të vjedhur një nga automjetet. Pas marrjes së denoncimit nga tre shtetas të ndryshëm, të cilëve u ishin vjedhur automjetet, shërbimet e policisë vepruan me shpejtësi, duke lokalizuar automjetet e vjedhura dhe sekuestruar ato si prova materiale.
Në kuadër të këtij operacioni u arrestuan A. G., 53 vjeç, banues në Ishëm, Durrës, i dyshuar për vjedhjen e një automjeti tip “Benz” në lagjen nr. 15, Spitallë, si dhe R. H., 24 vjeç dhe P. M., 25 vjeç, të cilët në një parkim në lagjen nr. 1, duke u prezantuar si punonjës parkimi, dyshohen se vodhën automjetin e një shtetasi.
Edhe E. Gj., 22 vjeç, banues në lagjen nr. 13, i dyshuar për vjedhjen e një automjeti tip “Volkswagen” u arrestua nga blutë.
Të arrestuarit do të përballen me akuzat në Prokurori, e cila ka marrë në dorëzim materialet procedurale për hetime të mëtejshme.
@zërionline
