Mbrëmjen e djeshme, sheshi “Liria” në Durrës u mbush me mesazhe ndërgjegjësuese në kuadër të Tetorit Rozë, muajit kushtuar ndërgjegjësimit kundër kancerit të gjirit. Aktiviteti u organizua nga Njësia Vendore e Kujdesit Shëndetësor në bashkëpunim me Bashkinë e Durrësit, duke mbledhur së bashku qytetarë, drejtues dhe përfaqësues të institucioneve për të përçuar mesazhin e rëndësishëm të kujdesit për shëndetin.
Kryetarja e Bashkisë Durrës, Emiriana Sako, vlerësoi përpjekjet për rritjen e ndërgjegjësimit dhe bëri thirrje për gratë që të mos neglizhojnë shëndetin e tyre. “Mbi 2800 mamografi janë kryer gjatë këtij viti,” tha ajo, duke theksuar rëndësinë e kontrolleve të rregullta, gjatë të gjithë vitit, për të parandaluar dhe zbuluar sëmundjen në fazat e hershme.
Në rolin e moderatores, Aurora Hyka, drejtuesja e NjVKSh-së, nënvizoi mesazhin e këtij Tetori Rozë: “Ia vlen të jetosh”. Ajo shtoi se diagnostikimi i hershëm shpëton jetë, duke i dhënë rëndësi përpjekjeve për të ndërgjegjësuar sa më shumë gra.
Deputetja Milva Ekonomi foli për ndryshimet pozitive në qasjen e grave nga zonat rurale ndaj kontrolleve shëndetësore, si dhe për përmirësimin e qëndrimit të burrave ndaj kujdesit për gratë e tyre. Ajo theksoi se mamografia është falas për gratë mbi 50 vjeç, jo vetëm në tetor, por edhe gjatë muajve të tjerë.
Deputetja dhe kardiologia Klodiana Spahiu bëri thirrje për të çuar përpara arritjet e deritanishme, duke vendosur si synim kryerjen e 50 mijë mamografive në vit brenda tre viteve të ardhshme. Ajo theksoi se kontrollet nuk duhet të kufizohen vetëm në tetor, dhe foli për nevojën e shërbimeve psiko-sociale dhe mbështetjes me medikamente.
Aktivistja e njohur e të drejtave të grave në Shqipëri, Bajana Çeveli ndau përvojën e saj personale me luftën kundër sëmundjes, duke inkurajuar gratë që të diagnostikohen sa më herët për një trajtim më të lehtë dhe efektiv. Një tjetër moment emocional ishte rrëfimi i infermieres Adelina, pjesë e NjVKSh-së, e cila u diagnostikua me kancer të gjirit dy vite më parë. Ajo tregoi me emocion betejën e saj dhe rëndësinë e zbulimit të hershëm të sëmundjes.
Aktiviteti i mbrëmshëm u shndërrua në një thirrje për të gjitha gratë, por edhe burrat, që të kujdesen për shëndetin e tyre, duke përçuar mesazhin se jeta ia vlen të jetohet plotësisht dhe me shëndet të mirë.
©️zërionline
