Këtë të premte është përkujtuar 181-vjetori i lindjes së themeluesit të shtetit shqiptar, Ismail Qemalit. Në Sheshin e Flamurit, pranë varrit të tij, Bashkia e Vlorës ka organizuar një ceremoni përkujtimore ku janë vendosur kurora dhe buqeta me lule, ndërsa janë kryer homazhe në nderim të “Babait të Kombit”.
Në ceremoni morën pjesë kryetari i bashkisë, Ermal Dredha, prefekti i qarkut Vlorë, Plator Nesturi, si dhe përfaqësues të Universitetit të Vlorës, që mban emrin e themeluesit të shtetit shqiptar. Nën tingujt e bandës frymore, autoritetet vendosën kurora me lule pranë varrit të Ismail Qemalit.
Kryebashkiaku Dredha dhe prefekti Nesturi e cilësuan këtë ditë më shumë se një nderim për babain e pavarësisë së Shqipërisë, duke theksuar vlerën dhe trashëgiminë e tij historike.
Gjithashtu, 24 janari përkon me 106-vjetorin e ndarjes nga jeta të Ismail Qemalit, atit të pavarësisë shqiptare. Ai ndërroi jetë më 24 janar 1919 në qytetin Perugia të Italisë, duke lënë pas një trashëgimi të vyer për kombin shqiptar.
©️zërionline
