Një tjetër aksident është regjistruar të shtunën në rrugën “Vllazërimi”, në zonën e Ish-Kënetës në Durrës, një ndër segmentet më problematike për qarkullimin rrugor në këtë qytet.
Nga informacionet mësohet se në përplasje janë përfshirë dy automjete, një mjet tip “Ford Fiesta” dhe një “Audi”.
Si pasojë e përplasjes, një nga drejtuesit e mjeteve ka pësuar plagë në kokë dhe është transportuar me urgjencë drejt Spitalit Rajonal të Durrësit për trajtim mjekësor, ku është jashtë rreziku, ndërsa janë shënuar dhe dëme materiale.
Si shkaqe kryesore dyshohen shkelja e qarkullimit rrugor, shpejtësia në drejtim dhe mosfunksionimi i semaforit në një nga kryqëzimet kryesore të zonës, një problem që është evidentuar edhe më herët nga banorët dhe drejtuesit e mjeteve.
Policia mbërriti në vendngjarje dhe nisi hetimet për të zbardhur dinamikën dhe përgjegjësitë e këtij aksidenti.
Rruga “Vllazërimi” njihet për numrin e lartë të aksidenteve, disa prej të cilave kanë qenë fatale, duke shkaktuar edhe humbje jete. Mungesa e sinjalistikës, ndriçimit natën dhe ndërhyrjet e pakta në sinjalistikë e bëjnë këtë segment veçanërisht të rrezikshëm, ndërkohë që kërkesat për ndërhyrje vazhdojnë të mbeten të paplotësuara.
©️zërionline
