Gjykata e Bielefeld-it në Gjermani ka dënuar me burgim të përjetshëm 34-vjeçarin Hüseyin Akkurt, i cili u shpall fajtor për vrasjen e boksierit shqiptar Besar Nimani. Ngjarja e rëndë ndodhi më 9 mars 2024 në qytetin gjerman, ku Nimani u qëllua për vdekje me 16 plumba, në një atentat të planifikuar bashkë me një person tjetër që ndodhet ende në arrati.
Sipas vendimit të gjykatës, vrasja është organizuar me paramendim, ndërsa autorët kanë vepruar me qëllim të qartë për të eliminuar viktimën. Gjatë gjithë procesit gjyqësor, i pandehuri Hüseyin Akkurt ka zgjedhur të mos dëshmojë dhe nuk ka dhënë asnjë shpjegim mbi motivin e krimit. Megjithatë, gjykata deklaroi se kishte në dispozicion mjaftueshëm prova për ta shpallur fajtor dhe për të vendosur masën më të rëndë të dënimit.
Prokuroria dhe përfaqësuesit ligjorë të familjes së viktimës kërkuan gjithashtu burgim të përjetshëm për të pandehurin.
Ngjarja ka pasur jehonë të gjerë edhe për shkak të një episodi tjetër të dhunshëm që ndodhi në fund të muajit shkurt para gjykatës në Bielefeld, ku katër persona u plagosën nga të shtënat me armë zjarri, përfshirë edhe babain e të pandehurit. Për këtë ngjarje janë arrestuar vëllai dhe një motër e Besar Nimanit, të cilët dyshohet se kanë vepruar për hakmarrje. Ata ndodhen nën masën e arrestit, por hetimet nuk kanë përfunduar ende për ngjarjen.
©️zërionline
