Policia e Durrësit ka ndërhyrë në tre raste të ndryshme gjatë ditës së djeshme, për ngjarje që variojnë nga aksidente fatale në rrugë, përplasje të shkaktuara nga drejtimi i automjetit në gjendje të dehur, deri te konflikte me armë sportive mes banorësh.
Një ngjarje tragjike u shënua në aksin rrugor “Plepa-Kavajë”, ku një këmbësore humbi jetën pasi u përplas nga një automjet. Policia njofton se është arrestuar në flagrancë shtetasi S. P., 54 vjeç, banues në Tiranë, i cili duke drejtuar automjetin, aksidentoi 42-vjeçaren A. M., e cila fatkeqësisht ndërroi jetë në vendngjarje.
Ndërkohë, një tjetër drejtues automjeti, shtetasi A. L., 50 vjeç, banues në Durrës, është vënë në pranga pasi, në gjendje të dehur, ka shkaktuar një përplasje me dy mjete të tjera, duke sjellë dëme materiale.
Nga Shijaku vjen një tjetër rast i pazakontë. Një konflikt mes dy fqinjeve në fshatin Xhafzotaj ka degraduar në kanosje me armë. Policia ka referuar materialet në Prokurori për shtetasen D. F., 77 vjeçe, e cila dyshohet se ka kërcënuar me armë sportive shtetasen V. L., 50 vjeçe. Gjatë kontrollit në banesën e të moshuarës, u sekuestruan dy armë sportive.
Të gjitha materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
©️zërionline
