Një tjetër jetë e humbur në asfaltin e aksit Thumanë-Kashar, një tjetër familje e shkatërruar dhe një tjetër lajm që po bëhet rutinë në kronikat e zeza.
Mesnatën e kaluar, në këtë segment rrugor, një 48-vjeçar humbi jetën pas përplasjes me automjetin e drejtuar nga një 22-vjeçar. I riu u arrestua nga specialistët për Hetimin e Krimeve në Komisariatin e Policisë Krujë, ndërsa hetimet vijojnë për të zbardhur rrethanat e plota të ngjarjes.
Por përtej njoftimit zyrtar dhe procedurave ligjore, mbetet një realitet i hidhur: rrugët në vend vazhdojnë të marrin jetë. Aksi Thumanë-Kashar ku shpejtësia e mjeteve i kalonshpesh normat e lejuara dhe i konsideruar si një ndër segmentet kryesore të qarkullimit, po përmendet gjithnjë e më shpesh për aksidente fatale. Pyetja që lind është e drejtpërdrejtë: a është bërë mjaftueshëm për sigurinë rrugore?
Shpejtësia tej normave, mungesa e kontrollit efektiv, sinjalistika e papërshtatshme apo infrastruktura me probleme janë faktorë që përmenden shpesh në rrugët tona, por rrallë shoqërohen me përgjegjësi konkrete. Ndërsa statistikat e aksidenteve shtohen, reagimi institucional duket se vjen gjithmonë pas tragjedisë, jo përpara saj, ose dhe mungon fare.
Një 48-vjeçar humbi jetën. Një i ri përfundoi në pranga. Dhe një tjetër natë u mbyll me sirena dhe drita blu në një rrugë që duhet të garantonte lëvizje të sigurt, jo fund tragjik.
©️zërionline
