Këshilli Kombëtar i Rezistencës së Iranit (NCRI) ka shpallur krijimin e një Qeverie të Përkohshme, duke e paraqitur këtë hap si fillimin e një procesi për transferimin e sovranitetit tek populli iranian dhe ndërtimin e një Republike Demokratike. Vendimi vjen në një klimë të tensionuar, pas sulmit të raportuar nga Shtetet e Bashkuara dhe Izraeli.
Në deklaratën e publikuar më 28 shkurt 2026, Këshilli Kombëtar i Rezistencës së Iranit thekson se iniciativa mbështetet në planin me dhjetë pika të paraqitur nga udhëheqësja e opozitës, Maryam Rajavi, më 20 qershor 2020. Sipas NCRI-së, ky plan përbën bazën politike të periudhës së tranzicionit dhe modelin e ardhshëm të qeverisjes së vendit.
Në thelb të dokumentit qëndron refuzimi i sistemit aktual klerikal dhe vendosja e sovranitetit popullor përmes një republike të ndërtuar mbi votën e lirë, universale dhe pluralizmin politik. Platforma parashikon zgjedhje të lira, ndarjen e pushteteve dhe respektimin e të drejtave themelore të njeriut.
Po ashtu, plani përfshin garantimin e lirive civile, si liria e fjalës, e organizimit politik, e tubimeve, e shtypit dhe e internetit. Një tjetër pikë kyçe është shpërbërja e strukturave që opozita i cilëson si represive, përfshirë Korpusi i Gardës Revolucionare Islamike dhe institucione të tjera të sigurisë, të cilat konsiderohen si mekanizma shtypjeje ndaj qytetarëve.
Shpallja e Qeverisë së Përkohshme shihet nga opozita si një hap drejt një tranzicioni politik, ndërsa mbetet për t’u parë se si do të zhvillohen ngjarjet në terrenin politik dhe diplomatik në ditët në vijim.
©️zërionline
