Një operacion ndërkombëtar i koordinuar nga Europol, i njohur si Project Medusa, ka zbuluar një rrjet kriminal që organizonte dhe nxiste sulme seksuale ndaj grave pas administrimit të drogave dhe medikamenteve qetësuese. Sipas njoftimit zyrtar të Europol, operacioni u udhëhoq nga National Crime Agency (NCA) e Mbretërisë së Bashkuar dhe Bundeskriminalamt (BKA) i Gjermanisë.
Sipas Europol, deri tani operacioni ka çuar në 57 arrestime, hapjen e 113 hetimeve penale, identifikimin e 156 personave, mes autorëve të dyshuar dhe viktimave, si dhe mbrojtjen e 158 viktimave. Gjatë hetimeve janë gjeneruar edhe 274 pista të reja hetimore, ndërsa janë zbuluar katër komunitete të reja online me përmbajtje mizogjene.
Sipas institucionit evropian të zbatimit të ligjit, autorët përdornin aplikacione të koduara komunikimi, forume dhe grupe të mbyllura në internet për të shkëmbyer udhëzime se si të drogonin gratë, për të siguruar medikamente dhe substanca narkotike, për të planifikuar sulmet dhe për të shpërndarë foto e video të abuzimeve. Europol thekson se këto komunikime tregojnë se nuk bëhet fjalë për raste të izoluara, por për një model të organizuar dhe të ndërlidhur kriminal.
Sipas Europol, shumica e rasteve kanë ndodhur brenda marrëdhënieve intime ose familjare. Autorët ishin shpesh bashkëshortë, partnerë ose ish-partnerë që shfrytëzonin besimin e viktimave për t’u administruar atyre substanca qetësuese, duke i lënë pa ndjenja ose me humbje kujtese. Hetuesit theksojnë se këto janë ndër krimet më të vështira për t’u provuar, pasi shumë viktima nuk kujtojnë ngjarjen ose substancat zhduken shpejt nga organizmi.
Sipas National Crime Agency, hetimi mori hov pas rastit të francezes Gisèle Pelicot, e cila u drogua për vite me radhë nga bashkëshorti i saj, ndërsa dhjetëra burra e përdhunonin pa dijeninë e saj. Autoritetet britanike vlerësojnë se ky rast nuk është më një përjashtim, por dëshmi e një fenomeni shumë më të gjerë të ushqyer nga rrjete të mbyllura online që normalizojnë dhe nxisin dhunën seksuale ndaj grave.
Në operacion morën pjesë autoritetet e Gjermanisë, Mbretërisë së Bashkuar, Francës, Spanjës, Holandës, Brazilit dhe Shteteve të Bashkuara, me mbështetjen e Europol, ndërsa Kanadaja dhe Hungaria kontribuuan në shkëmbimin e informacionit dhe mbështetjen hetimore. Sipas Europol, hetimet vijojnë dhe priten arrestime e identifikime të tjera ndërsa analizohen provat digjitale të sekuestruara.
©ZëriOnline
