Një zjarr i favorizuar nga era ka përfshirë një sipërfaqe me barishte në zonën e Koxhas- Fushë të Shijakut. Reja e dendur e tymit është përhapur në një rreze të gjerë, duke mbuluar edhe autostradën Durrës-Tiranë dhe duke ulur ndjeshëm shikueshmërinë për drejtuesit e mjeteve.
Në vendngjarje kanë mbërritur disa grupe të Shërbimit të Mbrojtjes nga Zjarri (MZSH) të Shijakut, të cilat po punojnë për vënien nën kontroll të flakëve. Për shkak të përmasave të zjarrit, është kërkuar mbështetje edhe nga forcat zjarrfikëse të Durrësit dhe Vorës.
Sipas informacioneve paraprake, deri tani nuk ka banesa apo objekte të rrezikuara.
Paraprakisht dyshohet se zjarri ka nisur pasi u është vënë flaka disa mbeturinave në një tokë bujqësore, por i favorizuar nga era është përhapur me shpejtësi edhe në barishtet e zonës. Megjithatë, shkaku i saktë i zjarrit pritet të përcaktohet pas verifikimeve.
©ZëriOnline
