Një 25-vjeçare humbi jetën dhe burri i saj mbeti i plagosur rëndë në rrethana ende të paqarta, mbrëmjen e kaluar. Detaje të reja dalin në dritë mbi ngjarjen.
Mediat në Kosovë raportojnë se dyshohet që bashkëshorti ka qëlluar me armë gruan e tij, e cila mbeti e plagosur rëndë dhe humbi më pas jetën rrugës për në spital.
Zëdhënësja e policisë për rajonin e Gjakovës, Vlera Krasniqi deklaroi se pas njoftimit për të shtëna me armë njësitë policore kanë dalë menjëherë në vendin e ngjarjes, ku në një dhomë gjumi kanë gjetur dy persona të plagosur, një burrë dhe bashkëshortja e tij.
Policia e Kosovës konfirmoi se gjeti në një dhomë gjumi çiftin e plagosur.
Të dy u transportuan drejt Qendrës Klinike Universitare të Kosovës (QKUK) për ndihmë mjekësore. Sipas njoftimit të QKUK-së, rreth orës 00:15 të 24 gushtit, në Qendrën Emergjente u pranuan dy persona nga rajoni i Malishevës.
“Një prej personave të pranuar, femër, 25-vjeçare, ka arritur në Qendrën Emergjente pa shenja jete, me plagë të shkaktuara nga arma e zjarrit”, thuhet në njoftimin e QKUK-së. Gruaja, e cila sipas raportimeve ishte shtatzënë, nuk mundi të mbijetojë.
Ndërkohë, bashkëshorti i saj, 26 vjeç, u dërgua në spital me plagë armë zjarri dhe vijon të marrë trajtim mjekësor. Gjendja e tij shëndetësore raportohet si shumë e rëndë.
Në vendngjarje, Policia e Kosovës ka gjetur dhe sekuestruar një armë zjarri, e cila dyshohet se është përdorur në ngjarje.
Për rastin është angazhuar edhe prokurori i shtetit, ndërsa hetimet vijojnë për të dokumentuar dinamikën e ngjarjes dhe për të përcaktuar motivin.
Rasti po hetohet si “vrasje e rëndë”, ndërsa autoritetet pritet të japin më shumë informacion në vijim, në varësi të zhvillimit të hetimeve.
Ngjarja ka tronditur komunitetin në Malishevë, ndërsa detajet e plota mbi atë që ka ndodhur brenda banesës mbeten ende nën hetim.
©ZëriOnline
