Një tjetër ngarkesë kokaine është tentuar të futet në Shqipëri përmes Portit të Durrësit, por kontrolli i policisë ka zbuluar drogën e fshehur në një kontejner që vinte nga Brazili.
Në kuadër të operacionit të koduar “Anchor 3”, Sektori për Hetimin e Narkotikëve në Durrës, në bashkëpunim me Policinë Kufitare dhe strukturat doganore, kontrolloi imtësisht një kontejner që, sipas dokumentacionit, transportonte mish pule.
Gjatë kontrollit, në pjesën e jashtme të kapakëve të kontejnerit u zbuluan 37 paketime me kokainë, me peshë totale 41 kilogramë e 350 gramë.
Sipas përllogaritjeve të policisë, droga kap një vlerë në treg prej rreth 2 milionë eurosh.
Ky është rasti i tretë i tentativës për futjen e lëndëve narkotike në Shqipëri përmes Portit të Durrësit brenda një muaji, duke e kthyer portin në një prej pikave ku strukturat e antinarkotikëve kanë intensifikuar kontrollet ndaj ngarkesave të ardhura nga Amerika Latine.
Hetimet vijojnë për të zbardhur itinerarin e kokainës, destinacionin final dhe personat që qëndrojnë pas kësaj ngarkese. Deri tani nuk bëhet e ditur nëse ka persona të arrestuar për këtë rast.
Materialet i janë referuar Prokurorisë për veprime të mëtejshme.
