Kapiteni i Zvicrës dhe mesfushori i Sunderland, Granit Xhaka, ka tronditur opinionin sportiv duke pranuar publikisht se ka siguruar një certifikatë të falsifikuar të vaksinimit kundër COVID-19 në vitin 2022. Përmes një deklarate zyrtare në profilin e tij në Instagram, 33-vjeçari u shpreh se ky veprim erdhi si pasojë e një gjendjeje të rënduar emocionale, frike dhe mosbesimi të thellë ndaj vaksinës në atë periudhë. Ky pranim ka sjellë largimin e tij të menjëhershëm nga grumbullimi i kombëtares zvicerane për ndeshjet e Ligës së Kombeve.
Çfarë shkruajnë mediat e huaja?
- The Guardian (Britani e Madhe): Mediumi britanik raporton se konfirmoi tërheqjen e Xhakës nga skuadra pas marrëveshjes me Federatën Zvicerane të Futbollit. Gjithashtu, theksohet se meqenëse ngjarja ka ndodhur në vitin 2022 kur ai luante për Arsenalin, klubi i tij aktual, Sunderland, ka refuzuar të komentojë mbi rastin.
- BBC Sport (Britani e Madhe): Në raportimin e BBC Sport pasqyrohet deklarata e plotë e lojtarit ku ai thotë: “Në atë gjendje të trazuar emocionale, unë sigurova një vërtetim vaksinimi, në vend që të sqaroja pyetjet e mia përmes rrugëve zyrtare. Sot e shoh qartë se ky ishte gabim”.
- Blick (Zvicër): Gazeta prestigjoze zvicerane zbulon se emri i Xhakës doli gjatë një hetimi më të gjerë ndaj një klinike mjekësore në Luzern, e cila dyshohet për lëshimin e qindra dokumenteve të rreme. Sipas tyre, prokuroria po verifikon lëvizjet e tij të vitit 2022, pasi certifikata e tij figuron e lëshuar në Luzern në një datë kur ai ishte në Londër duke luajtur me Arsenalin.
- Telegraph (Britani e Madhe): Media e njohur krahason rastin e Xhakës me dënimet e mëparshme në botën e sportit, si ai i ish-trajnerit të Werder Bremen, Markus Anfang, i cili u pezullua për 12 muaj për të njëjtën shkelje.
Pasojat ligjore dhe sportive
Sipas njoftimit të Prokurorisë Publike të Luzernit, ndaj Xhakës ka nisur zyrtarisht një procedim penal për “falsifikim dokumentesh” dhe “përfitim me mashtrim të certifikatave zyrtare”.
Kodi penal zviceran parashikon gjoba të rënda ose deri në 5 vite burg për këtë vepër. Megjithatë, ekspertët ligjorë të cituar nga mediat e huaja theksojnë se një dënim me burgim efektiv është pothuajse i pamundur për një person pa precedentë penalë, dhe rasti pritet të mbyllet me një gjobë të majme financiare.
Xhaka ka konfirmuar se po bashkëpunon plotësisht me autoritetet dhe do të paraqitet për t’u marrë në pyetje nga prokurorët zviceranë në fillim të muajit tetor.
