Situata e zjarreve në qarkun e Durrësit është përmirësuar, por dy vatra vijojnë të jenë aktive.
Sipas informacionit nga Shërbimi Zjarrfikës Durrës, janë shuar tre vatra zjarri që ishin aktive sot pasdite në Fllakë, Kullë dhe Perlat.
Ndërkohë, vijon ndërhyrja në Fllakë, te Çekrezi, pika e grumbullimit të skrapit.
Një tjetër vatër është aktive në Gjirin e Lalzit, në zonën e Bizës. Për monitorimin e situatës është stacionuar një mjet zjarrfikës, i cili do të qëndrojë në gatishmëri gjatë gjithë natës.
Sipas zjarrfikësve, deri në mëngjes do të vijojë monitorimi për të bërë një vlerësim më të plotë të situatës, ndërsa pritet të vlerësohet edhe mundësia e ndërhyrjes nga ajri.
