Merr fund kriza politike në Kosovë. Pas një periudhe ngërçi dhe negociatash mes forcave politike, Justina Shiroka-Pula është zgjedhur me 81 vota pro presidente e re e vendit, duke hapur rrugën për zhbllokimin e situatës institucionale.
Zgjedhja e Shiroka-Pulës erdhi pas zhvillimeve intensive politike dhe një propozimi të ri të kryeministrit Albin Kurti, i cili hodhi emrin e akademikes si kandidate për postin e kreut të shtetit.
Propozimi mori mbështetjen e nevojshme politike pasi kryetari i Partisë Demokratike të Kosovës, Bedri Hamza, bëri të ditur se PDK-ja e pranonte Shiroka-Pulën si kandidate, ndërsa kjo forcë politike paraqiti Eliza Hoxhën si kundërkandidate.
Marrëveshja u arrit pas një oferte të re të Kurtit, sipas së cilës Kuvendi do të trajtonte fillimisht ndryshimet në Ligjin për Dhomat e Specializuara dhe më pas do t’i hapej rruga procesit për zgjedhjen e presidentit.
Para votimit për kreun e ri të shtetit, Kuvendi miratoi në lexim të dytë ndryshimet në Ligjin për Dhomat e Specializuara. Projektligji mori mbështetjen e LVV-së, PDK-së dhe Aleancës, ndërsa deputetët e LDK-së nuk morën pjesë në votim.
Pas këtij zhvillimi, vëmendja u zhvendos te zgjedhja e presidentit dhe kandidatura e Justina Shiroka-Pulës, e cila ishte kthyer në pikën kryesore të kompromisit politik.
Shiroka-Pula nuk është një emër i panjohur në jetën publike të Kosovës. Ajo ka një karrierë të gjatë akademike, por në të kaluarën ka mbajtur edhe poste politike dhe institucionale.
E lindur në vitin 1953 në Prishtinë, ajo përfundoi studimet në Fakultetin Ekonomik në Prishtinë në vitin 1976. Studimet pasuniversitare në fushën e teorisë dhe politikës së zhvillimit ekonomik i kreu në Zagreb, ndërsa doktoraturën në Fakultetin Ekonomik të Universitetit të Prishtinës.
Karrierën profesionale e nisi në Bankën Popullore të Kosovës, përpara se t’i bashkohej Fakultetit Ekonomik, ku zhvilloi për dekada aktivitetin e saj akademik. Gjatë karrierës është marrë me ekonomi, menaxhim, kërkime operacionale dhe aplikimin e metodave matematikore e statistikore në ekonomi dhe biznes.
Shiroka-Pula ka pasur gjithashtu një karrierë aktive në politikë. Ajo ka shërbyer si ministre e Energjisë dhe Minierave në Qeverinë e Kosovës në periudhën 2008-2011 dhe më pas si deputete e PDK nga viti 2011 deri në vitin 2014.
Në vitin 2016 u zgjodh anëtare korrespondente e Akademisë së Shkencave dhe Arteve të Kosovës, për t’u bërë më pas anëtare e rregullt dhe për të marrë poste drejtuese brenda institucionit.
Në dhjetor të vitit 2025, Justina Shiroka-Pula u zgjodh kryetare e Akademisë së Shkencave dhe Arteve të Kosovës, duke u bërë gruaja e parë që mori drejtimin e këtij institucioni.
Emri i saj për Presidencën doli në fazën vendimtare të negociatave politike, pasi më herët ishin diskutuar edhe kandidatura të tjera. Propozimi i Kurtit dhe pranimi i kandidaturës nga PDK-ja krijuan kushtet për zhvillimin e procesit parlamentar dhe kapërcimin e ngërçit për kreun e shtetit.
Me zgjedhjen në krye të shtetit, Justina Shiroka-Pula kalon nga drejtimi i institucionit më të lartë akademik të Kosovës në Presidencë, ndërsa marrëveshja që mundësoi votimin i jep fund ngërçit që kishte mbajtur të bllokuar procesin për zgjedhjen e presidentit.
