Era e fortë që përfshiu zonën detare mbrëmjen e 8 tetorit solli probleme në Portin e Durrësit, ku trageti “GNV Blu” pësoi dëmtime në pjesën e kiçit pas kontaktit me kalatën.
Për shkak të dëmtimit dhe për të garantuar sigurinë e udhëtimit, kapiteni vendosi të mos kryente lundrimin e planifikuar drejt Barit të Italisë.
Situata solli ndryshimin e planit të udhëtimit për pasagjerët, të cilët u transportuan drejt portit italian me tragetin “AF Marina”. Anija alternative u nis nga Durrësi sot, më 9 tetor, rreth orës 11:00.
Sipas Autoritetit Portual Durrës, vendimi për të mos kryer lundrimin me tragetin e dëmtuar u mor për arsye sigurie, ndërsa pasagjerët vijuan udhëtimin me një tjetër mjet lundrues.
Rasti kthen vëmendjen te vështirësitë që mund të krijojnë kushtet e pafavorshme atmosferike në lëvizjen e mjeteve lundruese dhe në përmbushjen e orareve të transportit detar.
