Një email kërcënues për vendosjen e një bombe ka vënë në lëvizje edhe Policinë në Durrës, si dhe duke shkaktuar shqetësim në ambientet e Gjykatës së qytetit port. Mesazhi është dërguar në adresat elektronike zyrtare të disa institucioneve shtetërore, duke aktivizuar masat e sigurisë.
Në Gjykatën e Durrësit, mbërritja e emailit ka alarmuar punonjësit, ndërsa janë kryer verifikime në godinë për të kontrolluar nëse kishte ndonjë rrezik real. Sipas informacioneve paraprake, mesazhi kërcënues ishte i ngjashëm me atë të dërguar në fund të muajit gusht.
Forcat e Policisë kanë mbërritur në institucion dhe kanë nisur kontrollet përkatëse, ndërsa në të njëjtën godinë ushtron aktivitetin edhe Prokuroria.
Mesazhe të ngjashme kërcënuese janë raportuar edhe në institucione të tjera në disa qytete të vendit, mes tyre Tiranë, Fier, Vlorë, Gjirokastër, Berat, Lezhë dhe Shkodër.
Ndërkohë, vijojnë verifikimet dhe hetimet për të zbardhur rrethanat e rastit dhe për të identifikuar personin që ka dërguar mesazhet.
